DIE LEWE IS KOSBAAR

- maar nie absoluut nie!

Ons is die afgelope tyd deur omstandighede gedwing om weer na te dink oor lewe en dood… ook die lewe hierna ander kant die grense van ons aardse bestaan. 

Die lewe op aarde is kosbaar gawe van God voorreg om as mens op aarde te kan leef en ons Godgegewe opdragte en take uit te voer met lewenslus en dankbaarheid. Daarom raak ons opgewonde oor die geboorte van ‘n baba en hartseer by die afsterwe van ‘n geliefde. Die kosbaarheid en waarde van die lewe sien ons ook in die Tien Gebooie – jy mag nie doodslaan nie. Menslike lewe is baie belangrik vir God en moet beskerm word. Die mens is immers geskape byna God se beeld en is God se verteenwoordiger op aarde. Ons taak om die aarde te bewoon en bewerk is ‘n Goddelike opdrag. 

Maar die aardse lewe is nie die absolute nie, dis nie die hoogste waarde wat daar is nie, dis nie die “ultimate” nie, dis nie die heel belangrikste en die hoogtepunt nie. Anders gestel, daar is belangriker dinge as om net ten alle koste aan die lewe te probeer vasklou.

Hierdie perspektief kry ons in Paulus se gesprek met die ouderlinge van die gemeente van Efese. Paulus is op reis per skip na Jerusalem. Hy weet daar wag vir hom gevangeskap en vervolging. Die Heilige Gees het dit bevestig dat hy gaan ly. Hy neem nou afskeid van die ouderlinge van Efese en dan lees ons hierdie merkwaardige woorde : 

“Maar ek heg geen waarde aan my eie lewe nie, solank ek my lewenstaak en die bedieningsopdrag wat ek van die Here Jesus ontvang het, kan voltooi : om kragtig te getuig van die evangelie van die genade van God.” (Hand 20:24 2020 Vert) 

Verder aan op sy roete na Jerusalem het mense hom ook gesmeek om nie soontoe te gaan nie. En wat is Paulus se reaksie? Weereens verstommend!

 “Wat probeer julle bereik deur te huil en my hart te breek? Ek is bereid om nie net gevange geneem te word nie, maar om ook in Jerusalem te sterf ter wille van die Naam van die Here Jesus.” (Hand 21:13 2020 Vert)

Paulus se siening oor sy Godgegewe doel wat belangriker is as sy aardse lewe is nie iets vreemds nie, dis presies wat Jesus geleer het. Paulus radikale siening ("Is die man dalk mal", sal sommige vra.) is die direkte gevolg van sy geloof in Jesus. 

Jesus leer in Johannes 12 :25 “Wie sy lewe liefhet , verloor dit; maar wie sy lewe in hierdie wêreld gering ag, sal dit vir die ewige lewe behou.” Maak nie saak wat mense sê nie, maar Jesus se boodskap is baie duidelik - Daar is ‘n prioriteit van die ewige lewe. Dis die belangrikste. Dis wat tel! Dis wat jy moet behou.

Die kultusse wat leer - "The best life is now!" - lieg!

Jesus se lewe en sterwe, die evangelie feite het ook ‘n radikale nuwe perspektief op aardse lewe gebring. Jesus se oorwinning oor sonde, Satan, dood en hel maak dat ons anders kyk na lewe en dood as ongelowiges, maar ook as die gelowige mense van die Ou Verbond. Jesus se opstanding het vir ons HOOP gebring en ‘n nuwe toekoms na die graf geopen. 

Kom ek probeer dit so verduidelik : In die Ou Testament  word die aardse lewe as die lewe in God se teenwoordigheid geskets, die doderyk is nie ‘n lekker plek nie. Dis nie ‘n plek waar God geloof kan word nie.  Kyk byvoorbeeld na Psalm 6. “Iemand wat dood is, kan tog nie u Naam bely nie. Kan iemand in die doderyk U prys?” (Psalm 6:6) 

Daar was geen duidelike en positiewe verwagting in die Ou Testament van ‘n heerlike bestaan na die dood nie. Kom ek illustreer dit prakties. Koning Hiskia was ‘n vroom koning, ‘n man van God. Maar ons lees in Jesaja 38 dat hy baie siek geword het en dat die profeet Jesaja vir hom gaan sê het dat hy sou sterf. Wat was sy reaksie? “Hiskia het bitterlik gehuil.” (2) Hy het bitterlik gehuil en gebid dat hy gespaar sou word. Die Here het toe 15 jaar by sy lewe gevoeg. As ons na die Nuwe Testament kyk totaal ander prentjie. 

DOOD IS NOU IETS VOORDELIG!

Kyk byvoorbeeld na die kontras tussen Hiskia en Paulus – toe Paulus met die werklikheid van die dood gekonfronteer is tydens sy gevangeskap skryf hy vir die gemeente van Filippi uit die tronk.  En dan maak hy ‘n baie radikale uitspraak – “om te sterwe, is vir my wins.” (21) En dan gaan hy voort – “As ek in die lewe bly, kan ek voortgaan met vrugbare arbeid. Wat ek moet kies, weet ek nie. Ek is in ‘n tweestryd: ek verlang daarna om heen te gaan en met Christus te wees, want dit is verreweg die beste; maar in julle belang is dit noodsaakliker dat ek bly lewe."  (22-24) 

Hoor jy? Hier kry ons ‘n totaal ander perspektief op lewe dood. ‘n Heeltemal verskillende benadering. Die dood is nou nie meer ‘n verskrikking nie, maar ‘n WINS – dood is nou voordelig, soveel so dat Paulus selfs daarna uitsien! Wat die verskil maak is die evangelie – Jesus se kruis en opstanding! Paulus het die volle implikasies van die evangelie besef, koning Hiskia nie.

Hoe sien jy die lewe? 

Ja, hierdie lewe is kosbaar en ons moet voluit leef (ons sit nie in ‘n hoekie en wag om dood te gaan nie) Maar as kind van God weet ek dat hierdie lewe nie om myself draai nie! 

Hierdie lewe is die kans wat God ons gee om ons roeping uit te leef.

As jy ‘n kind van God is , is dit ook jou roeping om te getuig van die genade evangelie. Maar, ek wil vir jou vra : het jy ‘n hoopvolle en vreugdevolle perspektief op die ewigheid? Besef jy die beste is nie NOU nie, die beste kom nog? Hierdie wêreld is nie ons finale bestemming nie. 

"Die wêreld is ons woning nie." Soos die digter Totius geskryf het. Besef jy ons hoef nie die dood te vrees nie en ons hoef nie krampagtig en desperaat aan ‘n aardse bestaan vas te klou nie? 

Die eintlike vraag is – Het die evangelie van Jesus al vir jou ‘n werklikheid geword, jou aan die hart gegryp en jou lewensuitkyk verander? Het jy al kom drink by Hom die Fontein van lewende water?

Hierdie boodskap is ook op YouTube beskikbaar. Kliek op KOSBAAR

VERGEET DEUR DIE KERK

  - JA, DAAR IS 'N WOORD WAT STILWEG DEUR DIE KERK VERGEET IS!

'n Woord wat mens baie selde van kansels af hoor. En letterlik ken die meeste van ons jong lidmate glad nie eers meer die betekenis van die woord in Afrikaans nie. Dis egter ‘n woord wat gebruik is deur die heiliges van beide die Ou en die Nuwe Testament. Johannes die Doper het dit ook gebruik. Ons lees daarvan in sy prediking in Lukas 3:1-19 (lees dit gerus eers deur in jou Bybel)

Wat is dit?  TOORN

  Die woord het so skaars geword, kom ons kyk net eers wat dit beteken. Toorn gaan oor God se heilige regverdige woede, wraak en oordeel.  Dis nie ‘n sondige wispelturige onbeheerbare uitbarsting van woede  soos ons by mense kry nie. Dis God se heilige afsku van als wat sleg en verfoeilik is omdat God waarlik God is en net   GOED en HEILIG is! 

Johannes die Doper gebruik hierdie woord in die konteks van die komende oordeel. (9)

God se toorn is deel van wie Hy is, soos Hy Homself openbaar het in die geskiedenis, in die mond van sy profete , deur die laaste groot profeet Johannes die Doper maar, ook in die geskrifte van die apostels. Ja, dis deel van God se liefde, want sy liefde is gekant teen als wat sleg is!   Kom ons vat die pad vanaf die Ou Testament.

Voorbeelde uit die Ou Testament

 "Jy mag nie ander gode aanhang nie, ook nie gode van die volke in jou omgewing nie,want die Here jou God eis onverdeelde trou aan Hom. Hy is by jou, en as jy ander gode aanhang, sal sy toorn teen jou ontvlam en sal Hy jou van die aarde af wegvee."  (Deuteronomium 6:14,15)

"Die dag van die Here het nou gekom, dit is ‘n wrede dag, ‘n dag van gramskap en gloeiende toorn, ‘n dag waarop die land verwoes en sy sondaars uitgeroei word." (Jesaja 13:9)

 “My volk het koring gesaai maar dorings geoes, hulle moeite was tevergeefs. Hulle staan verslae, sonder oes, want die gloeiende toorn van die Here het hulle getref.” (Jeremia 12:13)

Nuwe Testament

Nou redeneer mense : “Ja, maar dit was voor Jesus se kruis. Ons leef nou mos na die kruis. Nou bestaan die toorn van God mos nie meer nie. Nou leef ons in die Nuwe Testament. Die tyd van Jesus en sy kerk en dis net liefde sonder toorn.”  Vriend, wees vriendelik gewaarsku, dis ‘n vals idee. As Paulus die evangelie verduidelik in Romeine dan doen hy dit teen die agtergrond van die toorn van God. Dis waar hy begin :  “God openbaar vanuit die hemel sy toorn oor al die goddeloosheid en ongeregtigheid van die mense wat die waarheid deur hulle ongeregtigheid probeer onderdruk.” (Romeine 1:18)

En terloops dis in hierdie konteks dat hy daarop wys dat God die mens weens sy ontkenning en minagting van God oorgegee het aan dit wat boos en onbetaamlik is... en heel eerste noem hy dan die gruwel van mense wat die natuurlike geslagsverkeer tussen man en vrou verander na ‘n onnatuurlike verkeer tussen vrou en vrou en man en man! 

Hierdie verskriklike verval en verdierliking van die mens is juis deel van God se uitgieting van sy toorn oor ‘n sondige mensdom.

Dis die deurlopende boodskap van Genesis tot Openbaring is  - sonde wek God se toorn op en Hy straf dit. Die uitdryf van Adam en Eva uit die paradys, die vervloeking van die aarde, die verwoesting deur die sondvloed in die tyd van Noag, die uitwissing van Sodom en Gomorra,  die oordele oor Egipte en later die Kanaäniete, God wat telkens sy eie volk straf met oorloë en hongersnood, die verwoesting van Jerusalem en die tempel, die uitdryf van Israel uit hulle land en die wegvoering in ballingskap... Ja, ook die sterwe van Jesus aan die kruis en die finale oordeel met die skeiding van skape en bokke.  Die ewige hel! Dit alles maak net sin vanweë God se regverdige TOORN teen sonde! 

GENADE

Maar dis ook net teen hierdie donker agtergrond (van God se toorn) wat die genade sin maak en heerlik helder skyn!. Dis waarom Jesus gekom het, om ons van die toekomstige toorn te verlos.  Paulus skryf hieroor aan die  Christene  in Tessalonika... “Want hulle vertel self aangaande ons watter ingang ons by julle gehad het en hoe julle jul van die afgode bekeer het tot God, om die lewende en waaragtige God te dien  en sy Seun uit die hemele te verwag, wat Hy uit die dode opgewek het, Jesus wat ons van die toekomstige toorn verlos.”  (1 Tessalonisense 1:9,10)

Wat van my en jou? Het ons al besef ons sonde wek God se toorn? Ja, ook die dinge wat die gemeenskap oor grappe maak (dronk word, los verhoudings) en maar stilswyend aanvaar. Ook die dinge wat deur Hollywood en die Huisgenoot goedgepraat word. Laat ons maar weet : God sal nooit sonde goedpraat nie, God sal nooit sy standaarde by ons sondigheid aanpas nie...

Mense is vir baie dinge bang.... vir die Sjinese virus, ekonomiese ineenstorting, vir die donker wolke van wanbestuur, korrupsie  en anargie. Ons moet eerder  bang wees vir God se toorn. 

En ja in sy liefde het God inderdaad vir ons 'n uitkoms gegee!

Die enigste skuilplek  is Jesus!   Die volledige vergifnis in Hom is ons enigste hoop. Draai jou rug op sonde vlug na Hom. Vlug soos Lot die opdrag gekry het om uit Sodom te vlug weens die aankomende toorn en  wraak van God. Hy het reageer, maar sy aanstaande skoonseuns het gedink dis ‘n grap. (Genesis 19:14) 

Het jy al van sonde gevlug en kom skuil by Jesus?

et jy al kom skuil by jesus?Het HHHHH

Terug by Johannes die Doper. Was Johannes dan net ‘n verdoemende oordeelsprediker? NEE. Nee hy was nié ‘n tipiese raasbek helvuurnar nie. Hy was  volgens Lukas ‘n verkondiger van die evangelie, die goeie nuus! 

Maar neem kennis, die verkondiging van God se toorn is deel van evangelieverkondiging in die volledige sin van die woord. En belangrik,  Johannes het nie net van die toorn van God gepraat as dit vir hom veilig was nie. Nee hy het hierdie boodskap van God se haat vir sonde persoonlik aan Herodes oorgedra. Herodes het sy broer se vrou gevat en Johannes het hom dapper aangevat!  “Hy het ook vir Herodes, die heerser, tereggewys oor Herodias, die vrou van sy broer, en oor al die ander slegte dinge wat Herodes gedoen het.” (19) Ons weet dit het uiteindelik sy lewe (kop) gekos! 

Ware profete van die volle waarheid van God soos Johannes die Doper is skaars. Dis net hulle wat durf praat oor die komende oordeel en toorn van God! Die rede is eenvoudig : Normaalweg kry hulle nie erepennings, eredoktorsgrade of Nobelpryse nie, nee, hulle koppe eindig op skinkborde! Die skinkbord van openbare veragting, familie verwerping  of  selfs sinodale uitsluiting en isolasie!  Maar dit maak nie saak nie - ons moet erns maak met die volle waarheid van God se Woord!

Belangrike naskrif!  Miskien het jy nog steeds 'n beswaar : "Ja, ek verstaan dat God toornig kan wees, maar
TOORN is nog steeds nie vir my 'n woord wat by Jesus pas nie! Jesus is tog so sag en liefdevol. Hy is tog die LAM!"  Jy is reg vriend, Jesus is inderdaad liefdevol. Die Lam wat sy lewe vir ons geoffer het! Maar ons lees inderdaad direk van sy TOORN. Mense sal eendag in angs vir sy toorn probeer wegkruip. Ons lees in Openbaring 6:16 - "Hulle het vir die berge en die kranse gesê: "Val op ons en bedek ons vir die oë van Hom wat op die troon sit, en vir die toorn van die Lam."

DIE KONING HET GEKOM!

Oor KONINKRYK, EVANGELIE EN EREDIENS (1)

Wat is die evangelie? Goeie nuus, ja maar watse goeie nuus? Hoe het Jesus self die evangelie beskryf? Hoe dink jy oor evangelie en Christenskap? 

‘n Groot meerderheid dink daaraan as ‘n polis teen die hel. Ek moet net gou Jesus aanneem as Verlosser (“my hart vir Jesus gee”) en dan is ek verseker teen enige helse gevaar en kan ek rustig voortgaan om vir my eie ideale te leef soos ek wil en goed dink. Dalk waag ek om my bekering uit te stel, sodat ek soveel moontlik tyd op aarde aan sondegenieting kan bestee... En as ek wel nou al vir Jesus "gekies" het sien ek in elk geval ook geen nodigheid vir die erediens nie, behalwe as om net so af en toe weer die voordele van my polis aan te hoor nie. Geen nodigheid vir heiligheid en toewyding nie… Of nog erger… ek sien Jesus as die waarmaker van my eie drome! 

Watter groot misverstand! Daarom is dit so ontsettend belangrik om te kyk wat is die evangelie/goeie nuus wat Jesus self verkondig het! Kom ons kyk hoe Jesus dit  gedoen het volgens Markus 1:14,15.

En nadat Johannes oorgelewer was, het Jesus in Galiléa gekom en die evangelie van die koninkryk van God verkondig en gesê: "Die tyd is vervul en die koninkryk van God het naby gekom; bekeer julle en glo die evangelie."

Die koninkryk het naby gekom! Dit klink dalk nie vir ons westerse demokraties gesinde mense soos goeie nuus nie. Ons hou nie juis van konings nie. Vir Israel natuurlik was dit ‘n totaal ander storie. God se koninkryk was vir hulle ‘n sigbare werklikheid. God het oor sy volk regeer deur die Dawidiese koningshuis. Die koning was nie veronderstel om as wrede tiran te regeer nie. Hy was die versorger, beskermer en verlosser van die volk van hulle vyande. Dinge het in praktyk natuurlik vreeslik skeef geloop. Weens die afvalligheid van beide die konings en die volk. Dit lei tot die verwoesting van die tempel en Jerusalem en loop uit op die tragedie van die ballingskap. Ellende!

DIE BELOFTE

Maar daar was hoop. Die volk van God het uitgesien na die herstel van die Dawidiese koninkryk, want God het ‘n belofte aan Dawid gemaak! 

 God beloof aan Dawid : “Jou koningshuis en jou koningskap sal vir altyd vas staan; jou troon sal altyd voortbestaan." (2 Samuel 7:17) In die donkerste tye van verwoesting en ballingskap het die  profete hierdie hoop van die herstel van die Dawidiese koningskap lewendig gehou. Byv. die profeet Jeremia wat die woord van die Here oordra: “Kyk, daar kom dae, spreek die HERE, dat Ek vir Dawid 'n regverdige Spruit sal verwek, en as Koning sal Hy regeer en verstandig handel en reg en geregtigheid doen in die land.” (Jeremia 23:5) 

Hoor mooi hierdie koninkryk sal 'n regverdige koninkryk wees – nie een van tirannie en lyding, onreg en uitbuiting nie, maar heerlikheid, vreugde en geregtigheid! 

DIE BELOFTE VERVUL

En nou kom Jesus – afkomstig uit die geslag van Dawid, gebore in die stad van Dawid, Betlehem! Nou verkondig “Hy die Koninkryk het naby gekom.” Almal wat kan hoor kry nou twee opdragte – bekeer julle – onderwerp julle aan hierdie Koning, buig voor Hom , eer Hom, gehoorsaam Hom en glo hierdie goeie nuus!

Die evangelie wat Jesus self verkondig het is die evangelie van die Koninkryk!

Wat van die apostels na Jesus? Wat was die goeie nuus wat die apostels verkondig het? Hulle het ook hierdie verwagting gehad oor die koninkryk. Toe hulle ‘n keer weer bymekaar was (na die opstanding, net voor die hemelvaart), het hulle vir Jesus gevra: "Here, is dit nou die tyd dat U die koninkryk vir Israel weer gaan oprig?" (Handelinge 1:6) Maar nou moes Jesus hulle reghelp. Die koninkryk kom nie op die manier wat julle gedink het nie. Hulle kry die opdrag : Julle moet nou getuies wees van die Koning en sy koninkryk van Jerusalem af tot aan die eindes van die aarde.

Die apostels se taak was dus die 

 PROKLAMASIE VAN DIE KONINKRYK EN DIE KONINGSKAP VAN JESUS. 

Blaai maar deur Handelinge en gaan kyk self : Handelinge 14:21,22, Handelinge 19:8, Handelinge 20:25, Handelinge 28:31.

Die evangelie is die evangelie van die koninkryk, dit gaan oor die dinge van die koninkryk! Ook die diaken Filippus se boodskap handel oor die koninkryk “Maar toe hulle Filippus geglo het, wat die evangelie aangaande die koninkryk van God en die Naam van Jesus Christus verkondig het, is hulle gedoop, manne sowel as vroue.” (Handelinge 8:12)

Wat van 1 Korintiërs 15:1-4, dis tog waar Paulus 'n duidelike opsomming van die evangelie gee? Dit gaan tog duidelik oor die drie groot heilsfeite - kruis, begrafnis en opstanding.

Broeders, ek maak julle die evangelie bekend wat ek aan julle verkondig het, wat julle ook aangeneem het, waarin julle ook staan,

waardeur julle ook gered word as julle daaraan vashou op die wyse waarop ek dit aan julle verkondig het, of julle moet tevergeefs geglo het.

Want in die eerste plek het ek aan julle oorgelewer wat ek ook ontvang het, dat Christus vir ons sondes gesterf het volgens die Skrifte;

en dat Hy begrawe is, en dat Hy op die derde dag opgewek is volgens die Skrifte;  

Paulus het nie 'n ander evangelie as Jesus self verkondig nie. Wat hy hier opsom is die detail lering oor hoe God die oorwinning van die koninkryk deur Jesus bewerk het. Dis eintlik lering wat ons eers begin verstaan nadat ons Jesus as Koning erken het, nadat ons op sy oproep gereageer het.

KERK EN EREDIENS

Waar pas die kerk en erediens in? Die kerk is die praktiese sigbare uitdrukking van hierdie koninkryk. Dis die sigbare teken van die herstel van wat verkeerd geloop het in die paradys. Die kerk bestaan uit mense op aarde wat die koningskap van Jesus aanvaar het en daarom volgens die wette en waardes van die nuwe koninkryk leef. Dis die voorafgestalte van die volmaaktheid wat kom.

 En belangrik-  Die koninkryk van God gaan nie meer oor net die herstel van Israel nie maar het nou ‘n internasionale gestalte. Die kerk bestaan dus uit mense van elke stam taal en nasie. Paulus praat by die apostelvergadering en sê : “Símeon het vertel hoe God in die begin uitgesien het om 'n volk uit die heidene vir sy Naam aan te neem. En hiermee stem die woorde van die profete ooreen, soos geskrywe is: Daarna sal Ek terugkom en die vervalle hut van Dawid weer oprig, en wat daarvan verwoes is, sal Ek weer oprig en dit herstel, sodat die oorblyfsel van die mense die Here kan soek, en al die nasies oor wie my Naam uitgeroep is, spreek die Here wat al hierdie dinge doen.” (Handelinge 15:16.17) Dit gaan hier oor die huis van Dawid (dinastie van Dawid) wat internasionaal herstel sou word! Die voormalige heidennasies is nou deel daarvan!

REDDING OM DEEL TE KRY AAN DIE KONINKRYK

Dis baie nodig dat daar ‘n paar regstellings in ons denke sal kom. Die evangelie gaan nie oor I, me and myself nie. Die evangelie gaan oor meer as persoonlike verlossing. Ja, natuurlik dit gaan oor persoonlike redding, maar redding om deel van die koninkryk te wees en die Koning te aanbid. Nou reeds en tot in ewigheid! Die koninkryk het gekom en ek kan nou deel daarvan wees. Onthou ons was almal deel van die Satan se duisternis, maar is nou deur Jesus daar uitgehaal en deel gemaak van Sy Koninkryk. Luister na   Kolossense 1:13 - “Hy (God) wat ons verlos het uit die mag van die duisternis en oorgebring het in die koninkryk van die Seun van sy liefde,” Jesus se Koninkryk is onstuitbaar. Elke knie sal buig en elke tong sal bely. Ek kan dit nie teenstaan nie. Ek kan myself net onderwerp. Die evangelie gaan dus nie in die eerste plek oor my belangrikheid, my drome en my gerief nie! Dis beslis nie net ‘n polis teen die hel nie. 

Die evangelie stel my voor ‘n uitdaging – onderwerp jou aan die Koning, val in by sy planne! 

En besing sy lof, verlustig jou in sy heerlikheid. Eer en aanbid HOM! Maar natuurlik dis nie iets negatiefs nie dit is ‘n seën! Want ons Koning is ‘n besondere Koning wat sy lewe vir ons afgelê het! Om Hom te dien en te eer is ‘n groot voorreg en vreugde. Mag ons verlos word van ons beheptheid met onsself en ons eie belange en agenda en mag ons met blydskap neerval voor sy troon en Hom aanbid!

Vir Deel 2 van hierdie reeks kliek op SAAM AAN TAFEL

Stellenbosch legitimasie?

Moenie jellievisse wees nie!`

Dis hartseer en pynlik maar ek moet dit sê. Die dwaling en godslastering in die NGK gaan van erg na erger.  Altyd nog 'n stappie verder... As ons as gewone predikante en lidmate dit nie gaan uitskreeu nie, gaan die klippe dit uitroep. Die leiers is oorverdowend stil... 

Ons steier nog onder die goddelose besluit van die AS 2019 om selfdegeslagverbintenisse kerklik te seën. Dis ‘n gruwel. Hier in Namibië was en is daar sterk reaksie hierteen onder die vaandel van Sola Scriptura. (kliek op Namibië staan op) 'n Groot aantal Woordbedienaars het dit onderteken. Dis onbegryplik dat ons amptelike orgaan die FELDMUIS hierdie stem probeer doodsmoor het...

Nou kom daar nog verdere vrot vrugte van ons liberale teologiese fakulteite na vore. Hierdie fakulteite het onheilsneste geword van liberale teologie, "emerging church" dwaling en radikale feminisme. Dit plaas ons geliefde kerk op ‘n onkeerbare glybaan van weersinwekkende heidendom! Luister, kyk en besluit self!

Kliek op GRUWEL

Let go and let God?

Sal God my help? En hoe doen Hy dit?

Hoe help Hy my in tye van rampe, krisisse en kwellings? In tye van persoonlike swaarkry, finansiële moeilikheid, huwelik en gesinsprobleme? Wat is God se rol in my persoonlike stryd teen sonde, moedeloosheid en depressie? Dikwels hoor mens die eenvoudige eenlynige antwoord en eenstop oplossing: "Let go and let God! "Of mens kry die raad : “Gee dit net vir die Here!”

Die bedoeling is dan waarskynlik – vertrou net op die Here en als sal reg uitwerk! Dit klink so wonderlik. So kragtig. Eenvoudig en vroom. Maar is dit regtig die volle Bybelse antwoord? Is dit hoe mens byvoorbeeld ‘n wiskunde eksamen moet benader? Is dit die oplossing vir jou finansiële krisis? Is dit hoe mens jou huwelikskonflik moet aanpak? Is dit die oplossing vir ons (elke kind van God) stryd teen sonde? Of anders gesê is dit die sleutel vir sukses op die pad van heiligmaking? Daardie moeilike pad wat elke kind van God beleef om al hoe meer heilig te word en gelykvormig aan Jesus te word.

Kom ons toets die gedagte van Let go and let God aan ’n paar Skrifgedeeltes binne konteks.

SPREUKE 3:5-7

“Vertrou volkome op die Here en moenie op jou eie insigte staat maak nie.

Ken Hom in alles wat jy doen en Hy sal jou die regte pad laat loop.

Moenie dink jy het die wysheid in pag nie, dien die Here en vermy wat sleg is:”

“Vertrou op die HERE met jou hele hart en steun nie op jou eie insig nie.

Ken Hom in al jou weë, dan sal Hy jou paaie gelykmaak.

Wees nie wys in jou eie oë nie; vrees die HERE, en wyk af van die kwaad; (OAV)

As mens so vinnig lees dan lyk dit of “Let go, let God” presies die raad van Spreuke is. Laat alles net aan die Here oor en als sal regkom. Maar dis nie heeltemal wat hier staan nie. Ja, daar moet vertroue op God wees, maar daar moet ook aksie van ons kant wees. Hier is ‘n opdrag -Tree op teen die verkeerde in jou lewe! “Wyk af van die kwaad, vermy wat sleg is.”

Dis vir die verstaan van hierdie teks ook belangrik om na die totale boodskap van Spreuke te kyk. Spreuke gaan oor wysheid. Vertroue op die Here beteken juis dat ek die wysheid wat van die Here kom prakties sal toepas in my lewe. Praktiese stappe neem. En hoe lyk hierdie wysheid? Dis alles behalwe ‘n passiewe “Let go and let God! “ Dis konkrete dade en keuses. Dink maar wat leer Spreuke ons : Ek moet kies om my kinders te tugtig, ek moet wegbly van verleidelike vroue, ek moet nie borg teken vir iemand anders nie ( bly weg van bedenklike finansiële praktyke), ek moet eerlike besigheid doen, ek sal omkopery vermy (17:23) ek moet hard werk, ek moet nie ‘n kermende kywende vrou wees nie – want dan gaan my man my los (Spreuke 21:9) ens. Gaan lees Spreuke en volg daardie raad in die praktyk– natuurlik is dit nie 'n towerstaffie vir gerief nie, maar jy sal die verskil in jou lewe begin agterkom! Kom ons wees prakties – Dit help nie net om te sê – Ek het my finansiële probleme vir die Here gegee nie, maar ek gaan aan om onnodige luukshede te koop, ek is te lui om kos te maak en leef van duur kitskos… Dit help nie ek vra : "Here maak my asseblief heilig", maar ek sit aand na aand voor die TV wat my gedagtes besoedel nie! Dit help nie, ek bid vir gesonder longe , maar ek weier om op te hou rook nie! Spreuke leer vir ons ‘n duidelike balans tussen vertroue op die Here en die praktiese toepassing van sy opdragte. Spreuke leer geen passiewe - “Let go and let God” nie!

ROMEINE 8:12,13.

“Daarom dan, broers, staan ons onder ‘n verpligting, maar nie teenoor ons sondige natuur om daarvolgens te lewe nie. As julle julle lewe deur die sondige natuur laat beheers, gaan julle die dood tegemoet, maar as julle deur die Gees ‘n einde maak aan julle sondige praktyke, sal julle lewe.” Hier gaan dit seker oor die grootste stryd in elke kind van God se lewe – die worstelstryd teen sonde. Wat is Paulus se opdrag? Let go and let God? Nee, dis ons aktiewe plig as kind van God om sondige praktyke uit te roei. Hoe doen ons dit? Deur die Heilige Gees. Deur die krag van die Gees. Dit beteken nie dat ons passief is nie. 

Dink aan ‘n windpomp. Heeltemal afhanklik van die wind. Tog is die windpomp aktief betrokke. Die rem moet los wees. Die windpomp kreun so hard werk hy, al kom die energie van die wind. Die Gees gee ons krag, maar ons moet tot aksie oorgaan. Deur die krag van die Heilige Gees sal ek ‘n telefoon optel en ‘n einde maak aan ‘n sondige verhouding!

HEBREËRS 12:4,14

“Julle het nog nie so teen die sonde weerstand gebied dat dit vir julle ‘n stryd om lewe of dood geword het nie. Beywer julle vir vrede met alle mense asook vir ‘n heilige lewe, waarsonder niemand die Here sal sien nie.” 

Weereens geen passiwiteit nie. Die skrywer moedig ons aan. “Julle moet weet hierdie stryd teen sonde is ernstig, dit vat alles van julle – 'n stryd om lewe en dood.” Wat behels dit positief? Beywer julle… weereens volle aksie en betrokkenheid van ons kant af!

2 TIMOTEUS 2:22 

“Maar vlug vir die begeerlikhede van die jonkheid en jaag ná geregtigheid, geloof, liefde, vrede, saam met die wat die Here uit 'n rein hart aanroep.”

Hier vind ons praktiese raad vir heiligmaking. Dit vereis aksie, negatief en positief. Vlug weg van als wat verkeerd is. Gebruik jou voete indien nodig. Bly weg van daardie partytjie waar jy versoek gaan word! Positief - Oefen die regte dinge in saam met ander mense wat ook ernstig is oor God!

2 PETRUS 1:3-5

“Sy Goddelike krag het ons alles geskenk wat ons nodig het om te lewe en Hom te dien. Dit kom deurdat ons Hom ken wat ons geroep het deur sy heerlikheid en mag.

Deur dit te doen, het Hy ons die kosbaarste en allergrootste gawes geskenk wat Hy belowe het. Daardeur kan julle die verderf ontvlug wat deur begeerlikheid in die wêreld werksaam is, en deel kry aan die Goddelike natuur.

En juis om hierdie rede moet julle alles in die stryd werp om julle geloof te verryk met deugsaamheid, die deugsaamheid met kennis,...”

God skenk sy kinders als wat nodig is vir ‘n heilige lewe. Maar hoor dan mooi verder : “Werp alles in die stryd!” Aksie! Dade! Vgl. Filippense 2:12,13 My geliefdes, julle was altyd gehoorsaam wanneer ek by julle was. Des te meer moet julle gehoorsaam wees nou dat ek nie daar is nie. Julle moet julle met eerbied en ontsag daarop toelê om as verloste mense te lewe, want dit is God wat julle gewillig en bekwaam maak om sy wil uit te voer.”

Ja, alle eer en dank aan God wat ons wil verander en vir ons bekwaamheid gee... Maar dit bring ons tot aksie. Ons moet gehoorsaam raak om te leef soos Hy wil hê!

Die eenvoudige raad "Let go and let God!" word goed bedoel. En as mense daarmee bedoel dat ons nie op onsself moet vertrou nie, maar absoluut in biddende afhanklikheid van God moet leef is dit ‘n groot waarheid. Dit kan egter maklik verkeerd verstaan word – as ‘n tipe passiewe toeskouer Christenskap. 'n Verskoning om nie verantwoordelikheid vir ons woorde en dade te vat nie. Dan is dit in stryd met wat die Woord ons leer. Die Bybelse boodskap is dat ons as kinders van God volkome moet vertrou op Jesus wat my skuld gedra het, dat ons volkome moet vertrou op die Heilige Gees wat in my woon. Maar hierdie vertroue moet oorgaan tot aksie en gehoorsaamheid. As ek mens iemand vertrou, gehoorsaam ek juis sy opdragte. As ek baie vertroue het in my huisdokter gaan ek juis doen wat hy my voorskryf... of dit nou oefening of pille of wat ook al is... Maak dus erns met al die opdragte in God se woord! Vra jouself, wat sê God se Woord oor alle sake in jou lewe. En gehoorsaam!

Vertroue op God beteken nie maar net om in enkele situasies of in tye van moeilikheid op God staat te maak nie. Nee, vertroue op God is 'n LEEFSTYL van dinge doen soos Hy dit in sy Woord beveel. Binne in so 'n verhouding bring Hy wonderlike uitkoms!

MAAK SOOS JESUS!

[Die waarheid as fondasie van RADIKALE LIEFDE]

VANUIT DIE TRONK! 

Filippense is ‘n opwindende brief! Een rede – die “real life setting” is so eenvoudig en duidelik. Paulus is in die tronk en hy bemoedig ouens buite die tronk. Merkwaardig! Nog meer merkwaardig - die oorheersende tema is blydskap. Hierdie brief wys dat geloof werk, dis realisties uitleefbaar en haalbaar in die donkerste situasies. In 'n Romeinse gevangenis, maar ook in ons tye van Covid, korrupsie, onreg  en kerkverkrummeling…

Een van die redes vir die skryf van die brief was om die gemeente te bedank vir ‘n geskenk wat hy van hulle in die tronk ontvang het. Paulus gebruik sommer die geleentheid om sy weldoeners aan te moedig tot blydskap en vergenoegdheid. Tog spreek hy ook goggas aan soos ‘n gebrek aan eensgesindheid (4:2)* en natuurlik dwaalleer. (3:2)** (Hy verwys op ‘n baie kras manier na hierdie dwaalleraars!)

VERMANING

Paulus vind dit dus nodig om die gemeentelede van Filippi op etiese en leerstellige vlak te vermaan. Ons sien dat Paulus se grootste begeerte vir die Filippense was dat hulle ‘n evangeliese eenheid en liefde tot mekaar sal openbaar. Die sleutel vir ‘n eenheidsgesindheid is om te besef wat ons deur Jesus ontvang het (“as, aangesien” in vers 1)*** Hierdie besef moet ‘n dankbaarheid wek wat onselfsugtig is. (3,4)****

Lees gerus nou eers Filippense 2:5-11****

JESUS AS VOORBEELD

Nou fokus Paulus op die kragtigste voorbeeld van nederigheid, opoffering, die ander hoër ag as jouself... JESUS! “Dieselfde gesindheid moet in julle wees wat daar ook in Christus Jesus was:” (5) Die opdrag, die imperatief is – “Wees soos Jesus in julle verhouding met mekaar!”

UITGEBREIDE CHRISTOLOGIE

Ons vind hier iets baie opvallend. Die etiese opdrag is kort, maar die teologiese begronding hiervan is baie uitgebreid en ongelooflik diep en deeglik. (Dis waarskynlik ‘n vroeg Christelike lied wat Paulus hier aanhaal.) Hierdie is een van die groot belangrike Nuwe Testamentiese gedeeltes oor die persoon en werk van Christus. Dit beskryf beide wat ons noem : sy trappe van vernedering en sy trappe van verhoging. Onontbeerlike Christologie. Anders as wat baie predikers van vandag dink – was dit vir Paulus belangrik dat mense die regte teologiese kennis moes hê, want Paulus het besef dat dit wat jy regtig verstaan en glo, neerslag gaan vind in jou dade.

Hier is dus geen oppervlakkige “Hi ouens julle moet nice wees met mekaar, want julle is ‘n klomp great ouens bymekaar” nie! Verre daarvandaan! Nee, Paulus se benadering is eerder : “Broers en susters, kom ons probeer iets verstaan van die geweldige vernedering wat Jesus ter wille van ons deurgegaan het en kom ons probeer iets verstaan van sy ontsagwekkende mag en majesteit! En in die lig hiervan durf ons nie anders as om mekaar radikaal onselfsugtig lief te hê nie!

Kom ons gaan net so vinnig deur die Christologie wat Paulus hier opsom: Dit gaan eerstens daaroor dat Jesus bereid was om van die grootste hoogte neer te daal en neer te buig na die diepste vernedering, vrywillig! Vir my en jou!

(6) Jesus het nie selfsugtig krampagtig vasgeklou aan Sy Goddelike regte en status nie! (Wat is die implikasie ons? Wees onselfsugtig lief vir ander. Vergeet van : “Dis my reg om...” of “Ek is belangrik...”) Dink weer mooi. Jesus was gewillig om na die stukkende gevalle, sondige wêreld te kom, nie as superheld nie, maar as beperkte mens onderhewig aan die “ellende” van menswees. Hy het swak en ellendig geword om ons te help. Vrywillig!

(7) Hy het Homself leeggemaak. Hy het nie sy Godheid afgelê nie, maar Hy het wel die menslike natuur aangeneem. Hy word een van ons. Waarlik Immanuel, God met ons. Hy het vlees geword en in ons skoene kom staan. Nie ‘n veraf gerieflike Redder nie. Die Kersboodskap is alreeds ‘n boodskap van vernedering en lyding! . Jesus is nie soos ‘n ryk donateur op ‘n afstand nie! (Hulle stuur mos graag geld , maar wil nie hulle hande vuil maak nie.) Jesus is anders, Hy kom maak letterlik sy hande en voete vuil ter wille van ons. Hy kom ook nie as super mens, semi Goddelike heerser nie, maar as dienskneg. Hy demonstreer dit letterlik in Johannes 13:3-5 (voetwassing)

(8) As mens word Hy absoluut gehoorsaam aan die Vader, ‘n gehoorsaamheid wat lei tot die afgryslike skande en vernedering van die kruis. “...nogtans nie my wil nie...” Aan die vloekpaal word Hy ‘n vervloekte – Galasiërs 3:14!

WORTELS IN DIE OU TESTAMENT

Twee Ou Testamentiese temas speel hier ‘n rol:

Jesus is as’t ware “Adam in reverse.” Adam en Eva wou soos God wees –opgaan, gelyk wees aan God, Jesus kom vrywillig af, word gelyk aan mense. Adam en Eva was ongehoorsaam, Jesus was volledig gehoorsaam aan God – ja, tot aan die kruis!

Hier is ook ‘n ego van Jesaja 53:12 die Lydende Kneg. Ons is ook geroep tot ‘n lewe van selfopofferende liefde vir ander!

VERHOGING EN VERHEERLIKING

Paulus bly egter nie stilstaan by die vernedering nie, maar gaan aan met die ontsagwekkende heerlike verhoging van Jesus! Dit soos jy weet behels Sy opstanding, hemelvaart, sit aan die regterhand van God, die magsposisie van die heelal! Daar is ‘n direkte verband tussen sy vernedering en die verhoging –“ daarom.” Omdat Hy bereid was vir die vernedering word Hy verhoog. (Die lesers moes hierdie implikasie in hulle lewens ook begryp)  Vernedering lei tot beloning!

“Daarom het God Hom ook uitermate verhoog en Hom 'n naam gegee wat bo elke naam is, “ (9)

Die hoogste naam? Here, God, Verlosser! Goddelike Verlosser! Dis die implikasie vanuit die agtergrond in die profesie van Jesaja! Jesaja 45:15 – “U is die God wat U verborge hou, die God van Israel, die Redder! Eers na sy lyding word sy ware identiteit bekend! Jesaja 45:23 – “Ek sweer by Myself; geregtigheid gaan uit my mond, 'n woord wat nie herroep word nie: dat voor My elke knie sal neerbuig, by My elke tong sal sweer.”

Paulus wil sê : “Sien tog raak wie Jesus is! Sy vernedering, maar ook die heerlike gevolge van sy vernedering! En wys sy gesindheid en karakter ook in julle lewens! (Terloops – hierdie bonatuurlike Christologie is onaanvaarbaar vir die ongelowige mens... destyds... maar ook vandag... Die wedergeboorte is nodig om dit te glo, te begryp en te waardeer!)

VERKONDIG CHRISTUS!

Mens kry die indruk dat lidmate tot satwordens toe vermaan word tot betrokkenheid, opoffering, eenheid, liefde... met min resultate. Dalk moet ons weer besef dis allereers nodig om Christus Jesus te verkondig en Hom as Gekruisigde, maar ook as die Verhoogde Messias. Die basiese heilsfeite is primêr en onontbeerlik. Slegs diegene wat aangegryp word deur die opofferende menswording en selfvernedering van Jesus, sy plaasvervangende lyding en sterwe, gaan getransformeer word tot ‘n gesindheid van radikale eenheid, opoffering en liefde! Alleenlik hulle wat in verwondering en blydskap juig oor die historiese feit van sy liggaamlike opstanding en die werklikheid van sy almag en majesteit word gemotiveer tot ‘n lewe van liefdesdiens. ‘n Liefde en eenheid nie gebou op die tydsgees van verdraagsaamheid (toleransie) vir sonde nie, maar ‘n liefde vir die waarheid. Wat ‘n groot waarheid! Wat ‘n groot liefde!

Ortopraksie volg op ortodoksie.*****

Leer ken die ware Jesus en jy sal begin reg leef! Ek bedoel natuurlik nie dat als gaan reg wees as ek bloot die heilsfeite ken nie, dat my lewe gaan verander as ek my katkisasie toetse deurgekom het nie. Ek bedoel dat as ek waarlik die feite rondom Jesus glo en dit vir my ‘n werklikheid geword het, sal my lewe nooit weer dieselfde kan wees nie. Onmoontlik! As sy vernedering en sy verhoging my aan die hart gegryp het kan ek nie ongeërg voortgaan op die pad van sonde, die soeke van eie belang en onvergewensgesindheid nie! Wat glo ek en jy werklik oor Jesus?

Slotopmerking – Die geskiedenis bewys dat daar waar Jesus as Verlosser vir mense persoonlik ‘n werklikheid word, hulle gedrag sal verander. In die 18de eeu was Engeland moreel op ‘n laagtepunt en op die rantjie van ‘n rewolusie soortgelyk aan Frankryk. Die haglike toestand van hierdie nasie was nêrens duideliker sigbaar as in die sogenaamde Gin Craze nie. Daar word bereken dat een uit elke sesde huis in London ‘n Gin shop was. (Sien Arnold Dallimore se George Whitefield, Vol I p25) Dit was die kragtige Christosentriese herlewingsprediking van George Whitefield en John Wesley wat die nasie geskud het en tot morele en maatskaplike hervorming gelei het!

Mag ons almal weer geskud word deur die evangelie van Jesus en so kom tot ‘n nuwe gesindheid in ons harte – die gesindheid van Jesus, wat ons anders sal laat optree!

NOTAS

· *Filippense 4:2 “Ek vermaan vir Euodia en ek vermaan vir Sintige om eensgesind te wees in die Here.”

· ** Hy spreek die dwaalleraars aan wat die besnydenis vir gelowige verpligting wou maak en noem hulle “hond” 3:2 - Let op die honde; let op die slegte arbeiders; let op die versnyding. (OAV)

· *** “Aangesien julle die troos in Christus ondervind het, die aansporing deur die liefde, die gemeenskap deur die Gees, die innige meegevoel en meelewing...”

**** 2:5 Want hierdie gesindheid moet in julle wees wat ook in Christus Jesus was.

2:6 Hy, wat in die gestalte van God was, het dit geen roof geag om aan God gelyk te wees nie,

2:7 maar het Homself ontledig deur die gestalte van 'n dienskneg aan te neem en aan die mense gelyk geword;

2:8 en in gedaante gevind as 'n mens, het Hy Homself verneder deur gehoorsaam te word tot die dood toe, ja, die dood van die kruis.

Daarom het God Hom ook uitermate verhoog en Hom 'n naam gegee wat bo elke naam is,

sodat in die Naam van Jesus sou buig elke knie van die wat in die hemel en die wat op die aarde en die wat onder die aarde is,

 en elke tong sou bely dat Jesus Christus die Here is tot heerlikheid van God die Vader. (Filippense 2:5-11)

***** ‘n regte lewenswyse volg op ‘n regte teologie!

BEGIN BY DIE BEGIN

- DIE BASIESE VERTREKPUNT VAN ALLE WAARHEID!

Waar kry ek ‘n antwoord vir al my baie vrae? Waar kry ek bevryding van al my vrese? Waar kry ek weer hoop in ‘n chaotiese, bose, korrupte en hartseer wêreld?  Begin by die begin! Ons weet daar is groot verwarring in ons tyd. Daar is ‘n ontelbare duisternis van opinies, talryke teorieë, soveel  slimmighede...Jy weet nie aldag wie om te glo en na wie om te luister nie... Waar gaan ek vastigheid kry?  Wat is die eerste heel basiese waarheid? Die fondament waarop alle antwoorde berus? Die basiese vertrekpunt? Begin by die begin!

Ons kry dit in Genesis 1:1!

Hieruit volg ‘n paar basiese vertrekpunte en vaste hoekpenne:

God alleen is die ewige oneindige Skepper.

Alle ander persone of dinge is skepsels of geskape dinge. Daar is ‘n basiese fundamentele onderskeid tussen God en sy skepping. God alleen is van ewigheid tot ewigheid. Sonder enige begin en einde. God alleen kan skep. Iets uit niks. Deur sy Woord. Hierdie unieke andersheid van God word vandag betwyfel deur iemand soos Benny Hinn wat leer dat die mens ‘n klein godjie is*, deur die panteïsme wat leer dat alles en almal goddelik is, ja ook deur die “spreek lewe” beweging wat leer dat die mens se woorde skeppingskrag het! Die basiese oersonde is om God nie as God te dank en te eer nie Om die skepsele te eer in plaas van die Skepper. Paulus skryf hieroor : “Van die skepping van die wêreld af kan ‘n mens uit die werke van God duidelik aflei dat sy krag ewigdurend is en dat Hy waarlik God is, hoewel dit dinge is wat ‘n mens nie met die oog kan sien nie. Vir hierdie mense is daar dus geen verontskuldiging nie, omdat, al weet hulle van God, hulle Hom nie as God eer en dank nie. Met hulle redenasies bereik hulle niks nie, en deur hulle gebrek aan insig bly hulle in die duister... Dit is hulle wat die waarheid van God verruil vir die leuen. Hulle dien en vereer die skepsel in plaas van die Skepper, aan wie die lof toekom vir ewig. Amen.” (Romeine 1:20.21, 25)

God bepaal die sin van als want Hy het als met ‘n doel gemaak. 

Jy en ek het ‘n doel. Daar is ‘n rede vir ons bestaan. En die rede kom verder in die skeppingsverhaal duidelik na vore. Om God te eer en namens Hom oor sy skepping te heers! Ons as mense is geskape na sy beeld. Dit plaas ons in ‘n ander kategorie as byvoorbeeld diere en plante. Ons het ‘n verstand om God te kan ken, ‘n wil om Hom te kies en ‘n emosie om Hom lief te hê. God self is die doel en die vreugde van my bestaan. Dit word so mooi gestel deur die Westminster Shorter Catechism wat vra : “What is the chief end of man?” (die mens se hoofdoel?) En dan die antwoord : “Man's chief end is to glorify God, and to enjoy him forever.” Dis waaroor alles gaan – om God te eer en te GENIET! 

Geen mens kan ware vervulling beleef sonder die aanbidding van God nie, want dis waarvoor ons ontwerp is!

God alleen is in beheer van sy skepping. 

Die ganse heelal. God bestuur die heelal. Alles gebeur volgens God se raadsplanne. “Deur Christus het ons deel geword van die volk van God soos Hy dit vooruit al bestem het. So het Hy Hom dit voorgeneem, Hy wat alles laat gebeur volgens sy raadsbesluit." (Efesiërs 1:11) Daar is geen mag groter as God nie. En ja, die duiwel is voorwaar soos ‘n brullende leeu, maar hy is ook net ‘n geskape wese. God het ook mag oor die duiwel en daar is nie ‘n kwessie van wie sal wen nie. Die uitkoms van die geskiedenis is nie in die weegskaal nie! Dit bring ontsaglike troos om te weet dat die Almagtige God volkome in beheer is van sy skepping – al lyk dit nie so nie. Dit het nie so gelyk tydens die kruisiging nie – dit het gelyk asof die Satan en bose mense die oorhand het, maar eintlik was hulle besig om God se triomfantlike plan uit te voer. Petrus praat op Pinksterdag met die Jode oor die kruisiging en dan sê hy : “God het besluit en dit vooruit bepaal om Hom aan julle uit te lewer, en julle het Hom deur heidene aan die kruis laat spyker en Hom doodgemaak.” (Handelinge 2:23) Ja, die Jode en heidene het verkeerd opgetree, hulle staan skuldig, maar ten diepste het hulle God se raadsplan uitgevoer!

God alleen (as Skepper en Eienaar) maak die reëls en Hy alleen het die reg om sy skepsele tot verantwoording te roep.

Daar SAL dus ‘n oordeel wees en daar is ‘n hel ongeag wat verdorwe mense ons vertel. Paulus praat hiervan in sy toespraak in Athene : “God het die tye van onkunde oorgesien, maar nou roep Hy al die mense oral op om hulle te bekeer, want Hy het ‘n dag bepaal waarop Hy regverdig oor die wêreld gaan oordeel deur ‘n Man wat Hy uitgekies het. As bewys daarvan vir almal, het Hy Hom uit die dood laat opstaan." (Handelinge 17:30,31) 

Dit beteken ons moet so lewe dat ons Hom behaag. Leef - Coram Deo Voor die aangesig van God! God se opinie is al wat tel! En moenie dat dwase mense vir God wil vertel dat sy oordele onregverdig is nie! Hoe kan mense wat absoluut onregverdig is vir die heilige God probeer beskuldig van onregverdigheid? Al God se besluite en oordele is goed, regverdig en volmaak!

God laat vaar nie die werke van sy hande nie. 

Hy gooi nie sy skepping weg nie. Hy onttrek Homself nie aan sy skepping nie. Dit gee vir ons hoop. Ons weet weens die sondeval is hierdie skepping verganklik en uiteindelik gedoem tot vuur! Maar dit gaan nie die einde wees nie. Daar kom ‘n nuwe hemel en nuwe aarde. “Maar ons leef in die verwagting van ‘n nuwe hemel en ‘n nuwe aarde wat God belowe het en waar die wil van God sal heers.” ( 2 Petrus 3:13)

ALLES DRAAI OM JESUS!

Die Bybel se boodskap oor God stop natuurlik nie hier by Genesis 1 nie. Dis maar die begin van ‘n asemrowende en aangrypende verhaal wat uitloop op die hoogtepunt van Jesus Christus se koms en werk. Die Nuwe Testament onthul vir ons die verrassende heerlikheid – die hele skepping draai eintlik rondom Jesus! Dis die heerlike waarheid van die Christelike lied in Kolossense 1:15-20.

“Die Seun is die beeld van God, van God wat self nie gesien kan word nie. Die Seun is die Eerste, verhewe bo die hele skepping.

God het deur Hom alles geskep wat in die hemel en op die aarde is: alles wat gesien kan word en alles wat nie gesien kan word nie, konings, heersers, gesagvoerders of magte. Alles is deur Hom en vir Hom geskep.

Voor alles was Hy al daar, en deur Hom bly alles in stand.

Hy is die hoof van die liggaam, van die kerk. Hy is die oorsprong daarvan, Hy is die Eerste, die Een wat uit die dood opgestaan het, sodat Hy die eerste plek in die heelal inneem.

God het besluit om met sy volle wese in Hom te woon

en om deur Hom alles met Homself te versoen. Deur die bloed van sy Seun aan die kruis het Hy die vrede herstel, deur Hom het Hy alles op die aarde en in die hemel met Homself versoen.”

‘n Meer verhewe beskrywing van Jesus se persoon en werk kan mens kwalik iewers anders vind! God het deur Hom als geskep, maar alles is ook vir Hom geskep. Alles bestaan dus ter wille van Jesus. En Hy self hou alles in stand! En hier kom die heerlikste - deur Jesus word ons met God ons Skepper versoen. 

Deur Jesus kan ek dus die almagtige Skeppergod my VADER noem.

Deur die vrug van Jesus se volmaakte soenoffer word die beeld van God wat deur die sondeval geskend is weer in my nuut gemaak en herstel. Hoe? Die Heilige Gees kom woon in my en heilig en verhelder my verstand om God te ken, Hy verander my wil sodat ek kan kies om God te eer en te gehoorsaam, Hy gee my ‘n nuwe hart, ‘n nuwe emosie om God waarlik lief te hê!

Kom ons bely met nuwe vreugde en sekerheid en vertroue- die waarheid van Genesis 1:1 : 

Wanneer ons hierdie belydenis regtig glo kwyn ons vrese algaande en groei ons lofprysing tot ‘n heerlike klimaks van aanbidding en bewondering vir ons Almagtige God! AMEN!

*Benny Hin : “May I say it like this? You are a little god on earth running around" (Praise-a-Thon, TBN, 6th November'90)

TRUMP IS 'N RAMP!

Laat ek dit duidelik stel al loop ek die gevaar om misverstaan te word en selfs van my beste vriende te antagoniseer. Hierdie man het ‘n groot gemors veroorsaak. Die mees blywende skade is dit wat sy gedrag aan die beeld van die evangeliese Christendom aangedoen het, weens Christene se openlike en kritieklose aanhang van ‘n goddelose narsis.

Is TRUMP ons Simson?

Donald Trump is binnekort nie meer president van die VSA nie.  Dis ’n feit...  Vir baie aanhangers is dit ’n  ontstellende gedagte en bitter pil om te sluk.

                                ’n Mens kan dit verstaan. Vir baie was hy die kampioen van ‘n “Christen Amerika”, vir sommige het hy semi-messiaanse status verwerf. Baie wonder nou : Gaan die son nou sak oor “Christen Amerika”?

Die geweldige ontsteltenis van Trump se evangeliese aanhangers kan mens ook begryp binne die konteks van die kulturele oorlog in die Amerikaanse samelewing. Trump se positiewe invloed in byvoorbeeld die aanstelling van bekwame konserwatiewe regters in die  Amerikaanse “Supreme Court” kan deur niemand ontken word nie!

Kommerwekkend vir my is, wel die bykans fanatiese aanhang van Trump deur belydende Christene.  Nog meer ontstellend is die rasionaal waarmee sommige hulle lojaliteit en lofprysinge aan Trump wat ’n goddelose lewe lei, regverdig. “Trump is ons Simson,” beweer so baie. Die argument klink so oortuigend: God gebruik so 'n  twyfelagtige karakter om sy volk  vir 20 jaar te lei en teen die vyand te beskerm, so Hy kan dit weer doen. Op die oog af is dit ’n  heel gepaste vergelyking. En die bos hare is nie die enigste punt van ooreenkoms nie... Simson was glad nie ‘n engel nie. Hy was waarskynlik ’n goeie kliënt van ’n hele paar prostitute en dit nogal heidense Filistynse vroue van die nag. Ons ken mos almal vir Delila en sy was sekerlik nie die enigste een nie!  “Trump het ook sy swaktes met vroue en geld en ’n oordrewe ego, maar God gebruik hom om goeie dinge vir die koninkryk te doen. Daarom moet ons hom steun.” So kon die argument gevoer word...

Vertrekpunte :

Voordat ek my probleem met sommige Christene se bewondering en soms selfs kritieklose openbare ondersteuning aan Trump probeer verduidelik, laat ek net ’n paar vertrekpunte duidelik stel:

Ek verskil met niemand dat Trump soms goeie dinge gedoen het nie. Selfs baie slegte ouens soos Hitler het ook soms goeie dinge gedoen. Hitler was sterk gekant teen kommunisme, soos ek glo ons almal is. En ek dink ons almal was bly toe Trump vir Sjina vasgevat het. Hoe suksesvol dit was, sal die toekoms moet leer...

God kan inderdaad goddelose en bose mense gebruik om sy raadsplanne te volvoer. Die Ou Testament is vol voorbeelde. God kan ook ’n donkie as prediker inspan, maar dit beteken nie ons moet ons beywer vir die legitimasie van donkies op die kansel nie!

Vir die rekord (as party dalk mag wonder). Ek is en was nog nooit ’n  ondersteuner van die Demokrate in Amerika nie. Nog nooit was ek ook ’n liberalis, sosialis, anargis of kommunis nie!

Nou wat is dan my probleem met die 

“evangelicals” se ophemeling van Trump? 

Eerstens. Ek betreur die feit dat Christene ongekwalifiseerd en luidkeels vir Trump prys en ondersteun. En wel op so ’n  manier dat dit die evangeliese Christendom se beeld kontamineer en kompromitteer.  

Die wêreld daarbuite verstaan nie allerhande fyn nuanses nie. Trump word deur baie evangeliese leiers en hulle volgelinge as ’n  Christen held voorgehou wat Amerika en die wêreld van allerhande bose skemas soos globalisering en sosialisme moet bevry.  Dit skep ’n  bepaalde (valse) beeld van Christenwees in die oë van die wêreld.  Dit lei tot ‘n skeeftrekking en verwringing van wat Christenskap behels.  Of ten minste ’n ernstige verskraling.  Wat bedoel ek? Ongelowiges wat die debat in Amerika volg kan die indruk kry dat aborsie en sosialisme doodsondes is, maar dat Christene hulle oë toeknyp vir die onheile van huweliksontrou, geldgierigheid, leuens en hoogmoedige selfverheerliking.  En verskoon my, maar wêreldlinge kan dalk ook die indruk kry dat Christene onnosele “conspiracy” entoesiaste is wat hulle deur enige glansgans swendelaar om die bos laat lei! Dis presies wat Trump is. ’n  Swendelaar. Voormalige Republikeinse presidentskandidaat kandidaat Marco Rubio het self op ‘n keer vir Trump ‘n “con artist” genoem! Baie gerespekteerde Amerikaanse Republikeine wou juis daarom niks met hom te doen hê nie. Dink John Mcain en Mitt Romney. En selfs sy eie handuitgesoekte handlangers moes uiteindelik deur die rookskerm sien...Tillerson, Mattis, Bolton, Barr... Waarom sê Ben Sasse, Republikeinse konserwatiewe senator van Nebraska, dat Trump  “flirted with white supremacists”, hanteer die presidentskap soos ‘n “business opportunity”, en “kisses dictators’ butts”? Die voormalige Republikeinse goewerneur van Kalifornië het Trump as die "worst president ever"  uitgekryt. So kan mens aangaan... Wat sien hierdie mense wat die onkundige evangeliese skape nie kan raaksien nie? Terloops, praat van onkunde, ek kry die indruk dat die gemiddelde Christen deesdae meer op hoogte is van die jongste “conspiracy” teorie as met die evangeliefeite self! Daar is groter vrees vir ‘n inentings as vir sonde!

Die kernvraag wat jy jouself moet vra : Is Trump se beeld,  leefstyl en waardes bevorderlik vir die evangelie in die wêreld?

Tweedens. Ek het ’n probleem met die tipe hermeneutiek en koninkryksperspektief wat van Trump ’n soort Simson kampioen van die hedendaagse Christendom en veral die Amerikaanse variasie daarvan wil  maak. 

Die Simson argument (waarna ek reeds kortliks verwys het) loop soos volg : Ja, ons weet dat Trump se sedelike morele lewe nie heeltemal op standaard is nie. Maar ons hoef nie te veel daaroor bekommerd te wees nie, want God het destyds vir Simson met al sy swakhede (soos vir vrouens) ook gebruik om sy volk te verlos. EINA!

Kom ek verduidelik hoekom ek hierdie tipe verskoning en verklaring hermeneuties onaanvaarbaar vind.

Dis berus op ’n subjektiewe eksemplariese verstaan van die Ou Testament wat erg problematies is. Met hierdie tipe van uitleg sou mens ’n menigte soort onheile soos veelwywery, etniese suiwering en  godsdienstige geweld uit die Skrif kon regverdig. Noag was dronk, so geestelike leiers met alkoholprobleme is aanvaarbaar?  Nee, ons lees die Ou Testament tog heilshistories. Die rigters, konings, profete en priesters van die Ou Testament was almal onvolmaak en juis daarom het Jesus ons volmaakte Middelaar en vervulling van al die ampte gekom en is ons hoop op Hom en nie op Amerikaanse ‘casinobaas’ Simsons nie! 

Ons kampioen is Jesus. Die arm, nederige 

en lydende Jesus. Nie die ryk, 

grootpraterige, gemaksugtige Trump nie! 

Die kontras kan nie groter wees nie!

(Natuurlik, Ou Testamentiese helde kan wel as voorbeelde voorgehou word, maar dan geïnterpreteer via die finaliteit van die openbaring in Jesus Christus. Soos Jakobus vir Elia as voorbeeld van ’n voorbidder gebruik.)

Die VSA is ook nie gelyk te stel aan Israel  van destyds nie. God se volk is nie meer een etniese of nasionale groepering nie, maar Sy kerk gekoop uit alle volkere wat verspreid as vreemdelinge en bywoners op die aarde woon. Baie Amerikaanse Christene maak hulle self skuldig aan ’n tipe sakralistiese denke dat God by voorkeur die God van Amerika is en dat sy koninkryk deur wetgewing bevorder moet word. Ek weet dis ’n oorvereenvoudiging en alle Amerikaanse Christene dink nie so nie. En tog...  Amerika het  allermis nie iemand soos Trump nodig nie, Amerika het verkondigers van die ware evangelie nodig!  Die liberalisme, valse teologie,  “Prosperity Gospel” en die pro LGBTQ kultuur van Amerika gaan nie deur wetgewing en bebaarde pro-Trump militialede (wat die Capitol bestorm) verander word nie, maar slegs deur ‘n ware egte werking van God se Gees. “Make America great again” is geensins ’n Christelike slagspreuk nie, want Amerika is nie gelykstaande aan die koninkryk van God nie.

Wat is die kern van die saak? Onthou maar wat Jesus vir Pilatus gesê het. 

"My koninkryk is nie van hierdie wêreld nie," antwoord Jesus. "As my koninkryk van hierdie wêreld was, sou my onderdane geveg het sodat Ek nie aan die Jode uitgelewer sou word nie. Maar nou is my koninkryk nie van hier nie"  (Johannes 18:36).  

Jesus het geen ideaal vir ‘n aardse utopie binne hierdie bedeling nie en daarom gebruik HY nie die middele van mag en geweld om dit te bereik nie. Nee, Hy stap die pad van die kruis!

Waar Christene hierdie boodskap van Jesus vergeet het, was daar ‘n bitter nasmaak met ernstige gevolge! Orals waar daar ‘n “huwelik” tussen kerk en staat, evangelie en nasionale belang was het dit ellendige nagevolge vir die geloofwaardigheid van die evangelie gehad. Die voorbeelde is te veel op te noem en wyd uiteenlopend. Dink maar aan die gevolge van die kruistogte in die Midde Ooste, die Münster tragedie en die erfenis van Oliver Cromwell se brutaliteit in Ierland. Nader aan ons lyf, die ongesonde vennootskap tussen kolonialisasie en sendingwerk, nasionalistiese politieke leiers soos Hendrik Witbooi wat moorde op onskuldige blankes vanuit die Bybel geregverdig het en laat ons nie vergeet van die destydse onheilige alliansie tussen die Nasionale party, die Broederbond en die NG Kerk nie! Jesus se volgelinge is nie veronderstel om jihadi’s te wees wat die koninkryk van God met die swaard, staatsmag en drukgroepe moet bevorder nie!

Ek weet sommige gaan my beskuldig van ‘n apatiese wêreldvreemde houding. Dis allermins wat ek wil bevorder. Elke Christen moet sy Christenskap op die markplein uitleef (van onderwysers, boere tot politici) en so sal ‘n hele kultuur positief beïnvloed word.  Dis egter iets heel anders as om fanaties opgewonde te raak oor ‘n aardse prins ! Ek dink Timothy Keller bekende leraar van New York het die regte balans: Oor Donald Trump sê Keller dat anders as ‘n geslag gelede, “many evangelicals are not looking to put Christians into power in order to turn the culture back to God; now they are looking for a protector, a champion.

“Both those evangelical strategies are wrong,” volgens Keller “Both of them are about power and saying, How are we going to use power to live life the way we want?  They’re not enough about service; they’re not enough about serving the common good.

“The proper cultural strategy is faithful presence within, not pulling away from the culture, and not trying to take it over. ‘Faithful presence within’ means being faithful; it means we’re not going to assimilate, [but] we’re going to be distinctively Christian. It’s about an attitude of service, uncompromising in our beliefs, but not withdrawing and not trying to dominate.

It takes real (and rare) wisdom to navigate between the Scylla and Charybdis of dominance and withdrawal, between control of the culture through political power, which is hardly a biblical archetype, and complete cultural separatism.”  Ja, 'n baie fyn balans en versigtigheid is nodig waar Christene hul op die politieke terrein begeef!

Jy mag maar van my verskil, maar Trump is nie my Simson nie. Hy is ‘n leuenaar en kansvatter.  Na sy aanhitsing van geweld wat uitgeloop het op die Capitol tragedie (waarin mense hulle lewens verloor het), dink ek hy hoort in die tronk. Punt.  

Trump laat ‘n spoor van leuens agter! Waar is die belastingopgawes wat hy sou vrystel? Hoeveel het Meksiko toe vir die muur betaal soos wat hy beloof het? Hy is lief vir ongesubstansieerde samesweringsteorieë soos byvoorbeeld dat Obama nie in die VSA gebore is nie. (birther conspiracy). Hy het geen morele kompas nie. Hy val Iran aan, maar is baie toegeeflik teenoor Saoedi Arabië (Kashoggi sage) en Turkye. Hy het die Koerde wat saam met hom teen Isis geveg het in die rug gesteek. Hy beledig Denemarke omdat hulle nie Groenland aan Amerika wou verkoop nie... Bedorwe klein seuntjie mentaliteit! Hy beledig mense links en regs met allerhande skeldname.* Probeer ander verkleineer.  Soos vir Mcain omdat hy ‘n krygsgevangene was, terwyl Trump self nooit eens diensplig gedoen het nie! En NEE, jy hoef nie CNN of ander vyandige linkse media te raadpleeg nie, lees maar net sy eie tweets! Trump se eie woorde veroordeel hom! En beslis gaan sy bombastiese “tantrums” geen vriende vir die evangelie wen nie, maar eerder ‘n struikelblok in die pad van die evangelie oprig!  

Billy Graham se kleindogter vat die gevolge van die evangelicals se geheul met Trump goed raak : “The entire world has watched the term ‘evangelical’ become synonymous with hypocrisy and disingenuousness,”  

‘n Ander evangeliese kommentator, Ed Stetzer terwyl hy positief is oor sekere van Trump se prestasies stel dit so : “He’s burned down the Republican party, emboldened white supremacists, mainstreamed conspiracy theorists, and more.Yet of greater concern for me is the trail of destruction he has left within the evangelical movement. Tempted by power and trapped within a culture war theology, too many evangelicals tied their fate to a man who embodied neither their faith nor their vision of political character."

Die bekende John Piper se kritiek op Trump is welbekend. Gaan lees dit maar self. 'n Mens is dankbaar vir elke evangeliese leier wat opgestaan het vir die waarheid! 

Daniël

 Ek vra met trane in my oë, kon Amerikaanse Christene nie vir hulle ‘n beter held vind nie? Ek kan verstaan dat die “Prosperity Gospel” ouens** so mal is oor die materialistiese Trump, maar verwag darem meer insig van Gereformeerde broers en susters. As ons dan ‘n hedendaagse held soek na analoog van ‘n Ou Testamentiese figuur, moet ons dalk maar vir Simson los en eerder ‘n Daniël soek teen wie se karakter geen beskuldigings ingebring kon word nie. Die vyande kon net sy getrouheid aan God kritiseer!  “Die ministers en die goewerneurs-generaal het toe iets teen Daniël probeer kry oor die manier waarop hy die administrasie behartig het, maar hulle kon nie. Hulle kon ook geen onreëlmatigheid vind nie, want Daniël was betroubaar en was aan geen nalatigheid of onreëlmatigheid skuldig nie. Hulle sê toe vir mekaar: "Ons sal niks teen hierdie Daniël kry nie, behalwe as ons iets kan kry in verband met sy godsdiens." (Daniël 6:5,6)

Vir ons getuienistaak in die wêreld het ons  Daniëls nodig en nie Simsons nie!

Die kerk van Jesus wat glo in die swaard van die Gees maak nie staat op wette en op (korrupte) prinse om die evangelie te bevorder nie.

Die triomf van die waarheid en die kerk kom deur suiwer prediking, die regte beoefening van die sakramente en ‘n Bybelse toepassing van  dissipline (kerklike tug), nie deur gedwonge uiterlike vertoning van openbare vroomheid nie. Mag ons weer terugkeer na hierdie beginsels met die krag wat God ons gee!

NOTAS

* Die jongste belediging is teen sy eie lojale vise president Mike Pence gerig. Trump se Facebook inskrywing. En onthou geen federale regter (waaronder Trump se eie aanstellings kon beduidende bewyse van bedrog wat die verkiesingsuitslag sou verander vind nie) :

Donald J. Trump

January 6 at 11:28 AM · Mike Pence didn’t have the courage to do what should have been done to protect our Country and our Constitution, giving States a chance to certify a corrected set of facts, not the fraudulent or inaccurate ones which they were asked to previously certify. USA demands the truth!

** Vergelyk die Suid-Afrikaans gebore vals profeet Kim Clement se profesieë oor Trump.

*